طافو کی مہدی حسن کے گلے نا مناسب پر جُگتیں
از، سید کاشف رضا
موسیقار اور طبلہ نواز طافُو کو مہدی حسن پسند نہیں۔ ان کا کہنا ہے کہ مہدی حسن کے گلے میں بھگوان نہیں، بَل کہ بھگوان کا کوئی چپڑاسی بولتا ہو گا۔ دلیل انھوں نے یہ دی ہے کہ مہدی حسن اونچے سروں میں نہیں گا سکتے تھے۔
مجھے فوری طور پر مہدی حسن کا گانا “کشمیر کی وادی کے وہ پُر کیف نظارے” یاد آ رہا ہے جس میں انھوں نے اونچے سُر میں یہ بول گائے ہیں:
وہ جب نہ ملی چھا گئے آنکھوں میں اندھیرے
اور پھر اس سے بھی اونچا:
تقدیر کسی کو بھی بڑے دن نہ دکھائے
ایسے گانے اور بھی ہوں گے۔ لیکن یہ درست ہے کہ ان کی آواز کا اصل حُسن دھیمے سروں کی گائیکی میں ہی تھا جسے ہمارے ایک کرم فرما رضی بھائی “گُن گُناہٹ” کہتے ہیں۔
مہدی حسن کی آواز میری سماعت میں پڑنے والی خوب صورت ترین آوازوں میں سے ایک ہے۔ اس آواز کو کسی بھی چپڑاسی کی آواز کہنا ایک جُگت تو ہو سکتی ہے مگر امرِ واقعہ ہر گز نہیں۔
اس کے علاوہ یہ بھی ہے کہ طافو خود ایک طبلہ نواز کی حیثیت سے معروف ہیں، سِتار نواز، پیانو نواز اور وائلن نواز کی حیثیت سے مشہور نہیں: یعنی وہ خود بھی موسیقی کے تمام آلات کے ماہر نہیں تو مہدی حسن سے کیوں یہ تقاضا کرتے ہیں کہ وہ ہر طرح کا گانا گا سکیں۔ ایسے تو علی عظمت بھی کہہ سکتے ہیں کہ مہدی حسن نے کبھی پاپ گانا نہیں گایا۔
طافو تعلیم یافتہ نہیں تھے اور ان کے خاندان کے باقی افراد، جیسے ماسٹر عبداللہ، کی بھی کئی جُگتیں مشہور ہیں۔ ان لوگوں کی جگتوں نے احمد رُشدی کو پریشان بھی کیا اور مہدی حسن اور ناہید اختر بھی ان جگتوں سے محفوظ نہ رہ سکے۔ ایک میڈم نور جہاں تھیں جو ان لوگوں کو انھی کی زبان میں جواب دے سکتی تھیں۔ ان جگتوں سے فن کار کا دل ٹوٹا ہو گا۔ فن کو جگتوں میں اڑانا مناسب نہیں تھا۔
تاہم میں بات کا قائل ہوں کہ طافو کو اپنا مؤقّف بیان کرنے کا حق ہے۔ میں نے کچھ عرصہ پہلے لکھا تھا کہ استاد نصرت فتح علی خاں کا عاشقِ صادق ہونے کے باوجود میں ان کی آواز کو عمدہ آوازوں میں شمار نہیں کروں گا۔ یہ ان کا کمال ہے کہ اس آواز کے باوجود وہ اتنے زیادہ اچھے گانے بنا پائے۔ اسی طرح عابدہ پروین جب غزل گاتی ہیں تو، میری نظر میں، غزل کو تباہ کر ڈالتی ہیں۔ تغزّل جیسی نازک چیز ان کے دھمال والے رنگ تلے دب جاتی ہے۔ اس پر زیادہ تر دوستوں نے اتفاق اور چند نے شدید اختلاف کیا تھا۔
مظفر علی سید نے کہا تھا کہ “تنقید کی آزادی” دنیا کی سب سے اہم آزادی ہے۔ طافو کو اپنی رائے کا بھی حق ہے اور ہمیں ان پر تنقید کا بھی حق ہے۔ موسیقی دان تو میں ہر گز نہیں، مگر ایک شائق کی حیثیت سے مہدی حسن کی آواز مجھے بے حد پسند ہے اور وہ اب بھی رہے گی۔
