رمضانی کہانچیاں : مائیکرو فکشن

از شکور رافع

کہانچی نمبر۔1

درد کی دوا پائی، درد بے دوا پایا

ہر سال وہ اپنے کشادہ آنگن میں تیس افطاریوں کا اہتمام کرتے ۔ ساتوں ملازم روزانہ سو ڈیڑھ سو افراد کی’ افطارتیاری‘ میں جتے رہتے۔

اس شام ان کا ایک اشتراکی دوست دالان میں آبیٹھا تھا اور خیراتی کلچر پہ مسلسل طنز کر رہا تھا۔

وہ چیخ اٹھے ’ یار ! بھیک تب ہوتی جب خیراتی اشتہارلگواتا۔ چند گلیاں پیچھے تنگ آبادی میں فیکٹری مزدوراور دیہاڑی دار کرائے پہ رہتے ہیں۔

یہ سب بڑی عزت سے آتے ہیں۔ وہ دیکھو! وہ بابا جو دکھائی دے رہا ہے ،یہ دن بھر جوتے گانٹھتا ہے اور یقین کرو سال بھر اس کے ہاتھ میں نوالہ نہیں دیکھا، گانٹھتا آلہ ہی دیکھا ہے۔ میں اس کے ساتھ بیٹھ کر جب سیخ کباب اس کی پلیٹ میں ڈالتا ہوں تو اس کی آنکھیں نم ہو جاتی ہیں۔۔۔

اور وہ بچہ دیکھو جو اپنا پیالہ آئس کریم سے لبالب بھرنے کے بعد نیچے گرا رہا ہے۔۔ اسے زندگی میں پہلی بار آئس کریم کا یہ رنگ ذائقہ عجیب لگ رہا ہے۔ بتاؤ، اگر چہروں پر یہ مسکراہٹیں رمضان کے بہانے ہی سے سہی، آ جائیں تو کیا مضائقہ ہے۔

دوست خاموش ہو گیا۔ توقف سے بولا

’مگر مہینے بھر کے لیے چہروں پرعارضی مسکراہٹ کے بجائے اگر مستقل کام روزگار مل جائے تو۔۔۔‘

’میں سالانہ آٹھ دس لاکھ نکال سکتا ہوں۔بولو، اب اس میں کتنے افراد کومستقل روزگار مل سکتا ہے‘۔

’صرف آٹھ دس لاکھ ہی کیوں؟‘دوست نے سیخ ٹٹولتے ہوئے کہا

’بینک منیجر کے مطابق پانچ کروڑ پر اتنی ہی زکواة بنتی ہے۔ کل دو فیکٹریاں تورہ گئیں یار۔‘

دوست نے سیخ کباب کی پلیٹ نیچے رکھ دی۔

٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭

کہانچی نمبر۔2

ماضاءاللہ

مہینے بھر کے تقدیسی اسلوب و بیاں میں عربی تہذیب گھلنا شروع ہوئی تو ’رمضان‘ کو ’ رامادان‘ کہا جانے لگا۔ ایسے ہی، ’ والضالین ‘ سے ’قضائے الہی‘ تک، بعض جذباتیوںنے’ ض‘ کو مستقلاً ’د‘ کی آواز ہی دے ڈالی۔ اسی مشق میں ایک نوجوان کودو تھپڑوںکی آزمائش سے تب گزرنا پڑا کہ جب اس کے طالبعلم ساتھی نے پوچھا : ’روزہ رکھا ہے؟‘

اور اس نے جواباً عربی صوتیات میں کہا ’ماداللہ، میں روزہ کیوں چھوڑوں گا؟‘

لڑکے نے تھپڑ لگا کرکہا۔ ’ابے ! مجھے ’ماں دلا‘ کی گالی کیوں دے رہا ہے‘

ایک حافظ صاحب نے فوراًوضاحتی بیچ بچاؤ کروایا کہ ’ماذءاللہ‘ کو ’ماضاءاللہ‘ کہنا پڑھنا غلط ہے

٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭

کہانچی نمبر۔3

ربنا آتنا فی الدنیا حسنتہ و فی الآخرہ

افسر نماز پڑھ کے آیا تو سراپا تسبیح تھا۔ موزے پہنتے ہوئے چپڑاسی سے کہا

’جاؤ بھئی نماز پڑھ کے آؤ، اس مہینے میں توآخرت بہت سستی ہو جاتی ہے۔‘

’جی۔ اور دنیا بہت مہنگی۔۔ ‘ چپڑاسی مسکراتا ہواباہر نکل گیا۔

٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭

کہانچی نمبر۔4

احترام لباس اور تنگ بھوک پیاس

لڑکا یونیورسٹی میں اپنی دوست سے : ’یار تم اتنی تنگ قمیضیں نہ پہنا کرو، ہمارے جذبات مجروح ہوتے ہیں‘

لڑکی :’ تو تم اپنے جذبات قابو کرو نا، میرا لباس نہیں۔‘

لڑکے نے لاجوابیت محسوس کی تو ہنس کر موضوع بدلنے لگا۔ اچانک لائبریری کے بائیں کونے سے شور اٹھا۔

پرانی الماریوں والے کونے میں بوتل اٹھائے لڑکے کو دو طالب علموں نے گھیر رکھا تھا۔

’ ہمارے سامنے کولڈ ڈرنک پی رہے ہو۔۔‘ ’ شرم آنی چاہیے۔۔ سرعام رمضان کا احترام مجروح کر رہے ہو‘

لڑکے نے اعتماد سے کہا: ’آپ اپنے جذبات قابو کریں نا، میری خوراک نہیں۔۔۔ بیمار ہوں میں!‘

’اوئے سرعام توہین، اوپر سے جگتیں۔ حافظ جی ادھر آنا ذرا!‘

دو تین کا ٹولہ چار پانچ تک ہی پہنچا تھا کہ’ باغی بیمار‘ بوتل پھینک کے بھاگ گیا۔

جمع ہونے والوں میں جذبات قابو کرنے کا درس دینے والی وہ ’تنگ قمیض دوشیزہ‘ بھی شامل تھی۔

٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭

کہانچی نمبر۔5

وہ طیش میں کرتے ہیں سوالات مسلسل ہم دیتے ہیں چپ سے جوابات مسلسل

کمرہ جماعت میں ادب کا استاد منافقت اور دکھلاوے پہ لیکچر دے رہا تھا۔ایک نوعمر جذباتی طالبعلم کو شہ ملی۔

’سرمجھے بھی یہ سمجھ نہیں آتی کہ اتنے مقدس مہینہ میں ،ہم ہر سال باقاعدگی سے، یہ پانچ جرائم کیوں کرتے ہیں؟‘

استاد سے پہلے طالبعلموں نے پوچھا : ’کون سے پانچ جرائم ؟‘

طالبعلم: جی نمبر۱۔ جرائم کی شرح میں یک مشت اضافہ ۔۔۔۔ نمبر۲۔ معمولات زندگی بالخصوص فرائض منصبی میں انتہائی کاہلی ۳۔ پیشہ ور بھکاریوں اور نکمے نکھٹووں کی بھرپور حوصلہ افزائی ،، نمبر4 .ذخیرہ اندوزی و مہنگائی سے غریب گھرانوں میں صف محرومی.. اور نمبر ۵ ۔ لڑائی جھگڑوں میں اضافہ۔

سر میرا سوال یہ ہے کہ ستر سالوں سے ماہ رمضان کی پریکٹس ہمیں ایک اچھا مسلمان اورایک دیانت دار پاکستانی کیوں نہیں بنا پائی؟

استاد خاموشی سے کتاب کھولتے ہوئے بڑبڑایا ’مجھے لگتا ہے کہ ہم انتہائی کاہلی سے نصاب مکمل کررہے ہیں۔ نکالیے صفحہ نمبر چھ۔۔۔‘

٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭

کہانچی نمبر۔6

بزرگوں کی روایت ہے

روزہ میں شکور صاحب اور ان کا خاندان کچھ زیادہ ہی مذہبی ہو جاتا ہے۔

انواع و اقسام کے پکوان ہونے کے باوجود ساتویں افطاری بھی کھجور سے ہوئی توچودہ سالہ بیٹے نے کھجور میں اٹکنے کی وجہ پوچھی۔

بابا بولے : ’یہ ہمارے بزرگوں کی روایت ہے۔‘

بعد از افطار تراویح پہ جاتے ہوئے چودہ سالہ پھر بولا : ’بابا۔اتنی بوجھل طبعیت میں تراویح ضروری ہے؟‘

بابا بولے : ’بیٹا، یہ ہمارے بزرگوں کی روایت ہے‘

خیر۔ لڑکا نیم شب بیداری میں ، رات ڈیڑھ بجے ہی’ سحری‘ کھا کے سونا چاہ رہا تھا کہ ابا نے اٹھا دیا۔

’یہ ہمارے بزرگوں کی روایت ہے کہ روزہ کی نیت سحری کے وقت ہی کی جائے‘

اچانک پنکھا بتی بند ہو گئے ۔ ابا نے غصے میں لڑکے کے ساتھ بجلی والوں کو بھی کوسنا شروع کردیا۔

لڑکے نے موندتی آنکھوں سے اتنا پوچھا: .”ابا۔ ہمارے بزرگوں کی روایت میں کیا بجلی پنکھا لائٹ بھی شامل تھی؟‘

چھوٹی بہن کی ہنسی اتنی گونجی کہ ابا کا یک لفظی جواب ’بے غیرت‘ قہقہے میں کہیں گم ہو گیا۔

٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭

کہانچی نمبر۔7

نیلی کڑھائی والا کرتا

رمضان کا پہلا عشرہ گزرتے ہی چوکوں چوراہوں پر عید ملبوسات و لوازمات کی نمائش شروع ہو گئی۔

چوراہے پر کھمبے تلے ٹھیلے والے نے بھی بچوں کے چند جوڑے لٹکالیے۔ مومی جاموں میں چمکتے رنگین کپڑے آتے جاتے غریب راہگیروں کی توجہ لیتے مگر خریداری میں دلچسپی ابھی کم تھی ۔

ایک پٹھان بچہ ، البتہ، روزانہ شام اپنے قد سے بڑا تھیلا اٹھائے وہاں آن رکتا اور کھمبے سے لٹکتا نیلی کڑھائی والا کرتا پاجامہ کچھ دیر دیکھ کر آگے بڑھ جاتا۔ تیسرے دن بھی اپنا گدلا سفید بوریا زمین پہ رکھے یہ کہنہ پوش بچہ نیلی کڑھائی والا کرتا دیکھ رہا تھا کہ ٹھیلے والے نے پوچھا:

’لینا ہے خان یہ جوڑا؟‘

’نہیں ماڑا۔ ابھی کام مندا ہے۔ ہم دعا کرتاکہ اس بار مل جائے۔‘

’خان۔جوڑا دعاؤں سے نہیں پیسوں سے ملتا ہے‘

’دعا سے ملتا ہے بھائی جان۔ ہم نے آج سحری میں دعا مانگا ہے اور اس وقت سے کاغذکوڑا چنتا ہے‘

’کیا دعا مانگا ہے؟‘

’خدائے پاکا۔۔ اس سال اتنا مزدوری دے دینا کہ بس میں یہ والا کپڑا پہن لے ‘

’ورنہ‘

’ورنہ ہم خود کش جیکٹ پہن لے گا۔‘

’ہاہاہا۔۔۔‘ دونوں نے قہقہہ لگایا ۔

لڑکا آگے بڑھ گیا۔

٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭

کہانچی نمبر۔8

رمضان ٹرانسمیشن سے واپس آتے ہوئے

۱۔ ’یار ایسی قوم کا کیا بنے گا جہاں ہر چوک میں بھکاری گاڑیوں پر دھاوا بول دیں۔اب اس بے شرم کو دیکھ ذرا۔۔۔‘

ب۔ ’یار۔ اذان ہونے کو ہے۔ بھکاریوں کو چھوڑ۔ گاڑی بھگا اور یہ بتا کہ ایک انٹری پاس پر دو موبائل فون کیسے اڑا لیے؟‘

۱۔ ’پہلا تو اپنے لیے مانگا۔ بیس منٹ بعد کیمرہ سامنے آیا تو ایموشنل انداز میں کہہ دیا : عامر بھائی عامر بھائی۔ بیمار اماں کو بھی موبائل چاہیے‘

ب۔ ارے واہ۔کیا بات۔اچھایہ دوسرا موبائل مجھے دے دے نا۔

۱ اور ب کے بلاوجہ کے قہقہہ میں بھکاری کی صدابھی شامل تھی۔

٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭

کہانچی نمبر۔9

(مذہبی تڑکے سے نام دام کماتا سرمایہ )

سیٹھ نے مارچ میں کیڑا کھجور کی دو ہزار بوری لی۔بولی کم لگی تو گودام میں رکھوا دی۔

رمضان کا چاند نظر آتے ہی چاندی ہو گئی۔پورے ڈیڑھ لاکھ کا منافع ہوا۔دس ہزار مسجد میں دئیے ، بیس ہزارمیں سو لوگوں کے راشن تھیلے تیار کروائے ۔ غریب عورتیں آتی تھی اور گاتی تھیں ’سیٹھ صاحب تو ولی ہیں۔۔‘

گیارہویں روزے کی افطاری میں ماسی اول نے کھجور کھولی تو کیڑے سرسرائے۔تنک کر بولی:

’ یہ ریڑھی والے حرام زادے۔۔ قبروں میں کیڑے کھائیں انہیں۔ رمضان میں بھی کیڑوں کا کاروبار کرتے ہیں‘

ماسی دوم نے دوسری کھجور کھجلاتے کہا:ارے ۔ سارے اب اپنے سیٹھ صاحب جیسے تھوڑی ہیں۔ اس بار بھی سو لوگوں کو راشن دیا ہے۔

کام کھجور سے ہے اور نسبت حضور سے ہے !‘

٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭

کہانچی نمبر۔ 10

جام جم سے جام سفال تک

پلازے کے مرکزی داخلے پر آہنی دروازہ لگایا جا رہا تھا۔

پانچ مزدور شدید دھوپ میں سیمنٹ لوہا ڈھوتے شرابور ہوئے تونیم گرم پانی کی گدلی بوتل اٹھا کر پلازے کے عقب میں آگئے۔ یہاں بھیڑ کم تھی دو جلد بازوں نے بوتل سے منہ لگایا ہی تھا کہ تیسرے نے ٹہوکا:

’ابے ۔ کیوں مروانا ہے۔سامنے دیکھو۔ کپڑے کی دکان پہ لڑکیاں آجارہی ہیں‘

’ہاہاہا.. ابے یہ دکان نہیں ہوتی۔ گوروں کے ڈریس برانڈ کا مہنگے والاشوروم ہے۔“ بارہ جماعت پاس ویلڈر بولا

’اچھا وہی نا.. ہیں تو کپڑے ہی یار‘

’تم بس پانی پیو اور کام سٹارٹ کرو۔ اتنا بھی نہیں پتہ کہ یہ کپڑے نہیں ، سپیشل کپڑے ہوتے ہیں‘

’تو کیا سپیشل کپڑوں میں آدھی باڈی ننگی ہوتی ہے ۔ ۔ہاہاہا۔۔ ’’ دوسرا مزدور بولا

ابے گاڑی میں دیکھ ذرا۔ کیا یہ پانی بھی سپیشل پیتی ہیں۔‘

خوفزدہ مزدور ہنس پڑے۔

بارہ جماعت پاس ویلڈر اب کی باریہ وضاحت نہ کر سکا کہ اسے پانی نہیں، بئیر کہتے ہیں۔

٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭

کہانچی نمبر۔11

صابن جاناں کا۔۔ آئل مولانا کا!

مشہور ماڈل نے ملٹی نیشنل کمپنی کو فون کیا:

دیکھئے۔ کنٹریکٹ سال کا تھا۔ آپ نے صرف چھ ماہ کی ادائیگی کی اورپچھلے ہفتہ سے اشتہار بھی اچانک بدل ڈالا ۔

’ رئیلی سوری مس۔رمضان کی وجہ سے کوکنگ آئیل والے اُس اشتہار میں مولانا فلاں کو ڈالنا پڑا۔ آپ جانتی تو ہیں ہی پبلک پرسیپشن۔۔۔ مگر آپ کے صابن اور لوشن والے اشتہارات ویسے ہی چلیں گے۔ براہ کرم ایک ماہ کی تکلیف ہے۔ ‘

ماڈل نے او کے کہہ کر کال ختم کر دی۔

٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭

کہانچی نمبر۔ 12

لو آپ اپنے دام میں صیاد آ گیا!

عصر کے بعد مولانا صبری فضائل پہ درس دیتے ہوئے بوقت افطار در آئے فقیر کو کھجور پانی تک پیش کر دینے کی روایتیں سنا رہے تھے۔

ان کا شرارتی بیٹا بھی رہائشی منزل سے نیچے آکروعظ سنتا رہا۔

افطاری کی اذان ہوتے ہی بچے نے مولوی صاحب کے سامنے سے پانی کاجگ اٹھا لیا۔

مولوی صاحب نے ایک تھپڑ رسید کر تے ہوئے کہا: ’ہر وقت مذاق نہیں ہوا کرتا‘

بچہ چیختے ہوئے بولا۔ ’ تو یہ بھی مان لیں ہر وقت صبر بھی نہیں ہوا کرتا ۔‘

٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭

کہانچی نمبر۔ 13

غربت کیا، اشارت کیا، ادا کیا

سیٹھ نے راشن کے دو سو تھیلے تیار کروائے۔

محلے کی مسجد میں اعلان ہوا تو عصر سے پہلے ہی ڈیڑھ سو خواتین لان میں جمع ہو گئیں۔سیٹھ نے بڑھتا مجمع دیکھ کر دروازہ بند کرنے کا کہا۔

نوکر نے گلی میں بیسیوں ماسیاں کھڑی دیکھیں تو چند ’منتخب ‘خواتین کو اشارے سے اندر بلا کر دروازہ لپیٹنے لگا۔

ایک ادھیڑ عمر خاتون اپنا برقع جھٹکتے ہوئے، آگے بڑھتے ہوئے چلائی : ’ پتر ! مینوں وی آن دے ۔۔میں وی ہالے جوان آں!‘

در پہ کھڑی سب خواتین ہنس پڑیں مگر دروازہ بند ہوگیا۔

٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭

کہانچی نمبر۔14

(ہجوم کافی ہے!)

کھجور کا معیار ذائقہ چکھتے ہوئے گاہک بڑبڑایا: ’ارے بھائی۔ یہ عجوہ والا ذائقہ نہیں۔ اوپر سے قیمت بھی تین گنا زیادہ لگا رہے ہو۔‘

’بھائی جان۔ آپ نے بھرے بازار میں احترام رمضان قانون کی خلاف ورزی کردی۔ اسی ریٹ پہ لیں ورنہ اللہ حافظ۔ ہجوم کافی ہے۔‘

گاہک منہ صاف کرتے مسکرایا: ’اچھا دو کلو دے دو یار ! ‘ شوخ دکاندار نے رقم لیتے ہوئے پچاس روپے کی رعایت کر دی۔

٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭

کہانچی نمبر۔ 15

چڑچڑا زندگی بھر چڑچڑا ہی رہتا ہے

خشک مزاج کتابی دوست تھا۔ سال بعد ملا ہو گا۔ صرف اتنا پوچھا کہ کتنے روزے رکھے ۔ جواب دیکھئے:

’ جب اللہ میاں کہتے ہیں کہ روزہ میرے لئے ہے میں ہی اس کا اجر دوں گا تو سب یہ کیوں پوچھتے ہیں کہ روزہ رکھا ہے یا نہیں؟‘

’بھئی ۔ ہم انسان بھی تو انسان سے محبت کرتے ہیں ۔ شک سے نہیں، محبت سے پوچھتے ہیں پاگل۔۔‘ میں نے وضاحت کی

’اگر انسان سے محبت ہے تو یہ پوچھو نا کہ اپنے بینک بیلنس اورزیور پر کتنی اور کسے زکواة دی ہے۔ بنگلہ زمین کی آمدن پر کتنا تقسیم کیا۔ فطرانہ کتنا اور کہاں دے رہے ہو۔ ۔۔ہاہاہا۔۔محبت انسان سے۔۔ تفتیش بھوک پیاس کی۔۔بڑی عجیب بات کی!‘

یہ سوچ کر چپ رہا کہ خشک مزاج کتابی دوست زندگی بھر چڑچڑا ہی رہتا ہے۔

٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭

کہانچی نمبر۔16

(اس نے کہا ’ عدیم ! میرا ہاتھ تھامنا ‘ چاروں طرف سے لوگ نمودار ہو گئے)

دوسری چھت پہ مدرسہ کمروں کی تعمیر آٹھ ماہ سے رکی پڑی تھی۔

خطبہ جمعہ چونکہ فضائل رمضان پہ تھا اس لیے چار پانچ سونمازی روزہ داروں کے اجر وثواب سنتے تھے اور سر دھنتے تھے۔

اچانک امام صاحب نے مال کی محبت ختم کیے بغیرروزہ کشی کو فقط بھوک پیاس قرار دیتے ہوئے اور خانہ خدا کی تعمیری روایات و ثمرات سناتے ہوئے یہ وعید بھی دے دی کہ خدا کے پاس تمہاری بھوک پہنچتی ہے نہ پیاس۔۔۔

بھوکے پیاسے سرشار مقتدی اچانک متفکر سے ہوئے۔

عین اسی لمحے چندے والا توندی رومال صفوں سے گزارا گیا جودیکھتے ہی دیکھتے اتنا بھر گیا کہ امام صاحب نے مدرسہ کی فوری تعمیر کے آغاز کی خوش خبری سنا دی ۔

٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭

کہانچی نمبر۔17

(شعبان کا آخری گاہک)

گاہک: ’ جناب۔ آپ کا فاسٹ فوڈ سینٹر تو اب مہینہ بھر بند رہے گا۔ کرایہ کیسے نکالیں گے ؟‘

کیشئیر : ’نہیں جی۔ ہم فاسٹ فوڈ کے بند دروازے پرہی پھل فروٹ اور پکوڑوں سموسوں کی دو الگ الگ ریڑھیاں لگوا رہے ہیں۔

امید ہے کرایہ کے ساتھ کچھ اضافی سرمایہ بھی نکال لیں گے۔“

گاہک: ’واہ جی۔اچھا آئیڈیا ہے۔ یعنی روزے داروں کی خدمت بھی اور۔۔۔‘

’اور ان کی حجامت بھی۔ ‘ ملازم لڑکے نے گرہ لگائی۔

٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭

کہانچی نمبر۔ 18

(ویلیوز، کسٹمز سے ویلیوڈ کسٹمر تک)

’جی رابعہ بات کر رہی ہوں سر.. مسلم بینک سے.. کل شروع ہونے والے مقدس مہینے کی مبارک ہو آپ کو سر‘

’جی بہت شکریہ آپ کو بھی مبارک‘

’سر گزشتہ برس آپ نے رمضان سے پہلے اپنی رقم نکلوا لی تھی۔ اس بار بھی آپ نکلوانا چاہیں تو ہم آج رات گئے تک موجود ہیں لیکن حکومتی نوٹیفکیشن کے مطابق کل ہمیں زکواة کٹوتی کرنا پڑے گی۔ ‘

’اوہو.. بالکل یاد نہیں رہا اس بار. بہت شکریہ.. میں پانچ بجے تک پہنچتا ہوں۔‘

’بہت شکریہ ویلیوڈ کسٹمر۔ بابرکت مہینے میں ہمیں بھی دعاؤں میں یاد رکھیے گا۔ اللہ حافظ‘

’اللہ حافظ‘

٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭

کہانچی نمبر۔ 19

(مبارک بادیں)

شام جانے والے تازہ دستے سے الوداعی ملاقات کے بعد صدر امریکہ آفس چیئر پہ ہی نیم دراز ہوئے کہ پرسنل سیکرٹری نے آہستگی سے کہا۔

’سر۔پریس ریلیزکا فائنل ڈرافٹ تیارہے۔ آپ کے دستخط….‘

’کونسا پریس ریلیز…‘ صدر تھکے ہوئے لگ رہے تھے۔

’سر ۔ وائٹ ہاؤس آفیشل ریلیز ۔ مسلم تہوار رمضان پر آپ کا مبارکبادی پیغام ۔ ‘

’رمضان نہیں، رامادان مسٹر سیکرٹری۔ اوکے ۔ لائیے ڈرافٹ ‘

صدر ارتی مسکراہٹ پر سیکرٹری نے بھی ڈرافٹ کے ساتھ مؤدبانہ مسکراہٹ پیش کردی۔

٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭

کہانچی نمبر۔ 20

( انسان اور شیطان)

وہ زیادہ مذہبی نہیں تھا مگر رمضان میں باقاعدگی سے مسجد جاتا۔ روزانہ نماز فجر کے بعد مولوی صاحب چند منٹ کا درس دیتے تھے۔

پانچویں فجر کے بعد مولوی صاحب شیطان کے زنجیروں سے قید ہوجانے کا واقعہ چھٹی بار سنارہے تھے۔ وہ سنتا رہا۔

دعا کے بعد بلند آواز میں اتنا کہا : ’مولانا! شیطان کی قید کے باوجود اگر انسان کا نفس اس سے گناہ کرواتا رہتا ہے تو پھر آپ کو بھی اپنے وعظ میں انسان انسان زیادہ کرنا چاہیے۔۔ شیطان شیطان کم!!!‘

یہ کہہ کر وہ فوراً باہر نکل گیا۔ ایک جذباتی مقتدی نے فوراًمولوی صاحب سے پوچھا : ’یہ پاگل کون تھا؟‘

’شیطان!‘ مولوی صاحب مسکرائے۔

٭٭٭٭٭٭٭٭ختم شد٭٭٭٭٭٭٭٭