عوام کی بے لوث خدمت، ورکرز پارٹی کوریا کے وجود کا جواز اور نا قابل تسخیر طاقت

عوام کی بے لوث خدمت، ورکرز پارٹی کوریا کے وجود کا جواز اور نا قابلِ تسخیر طاقت کی بنیاد ہے

ترجمہ از، عرفان شہزاد

یہ خطاب، ورکرز پارٹی کوریا کے پہلے سیکریٹری، ڈی پی آر کے (DPRK) کے قومی دفاعی کمیشن کے پہلے سربراہ اور کوریائی عوامی افواج کے سپریم کمانڈر، کامریڈ کم یونگ ان نے ڈبلیو پی کے (WPK) کی تاسیس کی 70ویں سالگرہ ، 10 اکتوبر، 2015کو منعقدہ تقریب کے موقعے پر فوجی پریڈ اور پیانگ یانگ (Pyongyang) کے شہریوں کے عوامی جلسے سےکیا۔

“کوریائی عوامی افواج اور عوام کی داخلی محافظ افواج کے بہادر افسران،
عظیم ورکرز پارٹی کوریا کی تاسیس کی 70ویں سالگرہ کے موقعے پر فوجی پریڈ میں حصہ لینے والے افسران اور یونٹوں کے افراد، کارکنان ،
پیزنٹ ریڈ گارڈ ز اور ینگ ریڈ گارڈز کے ممبران ، جماعت کے ممبران اور سارے ملک کے پیشہ ورو، پیانگ یانگ کے معزز شہریو، سمندر پار ہم وطنو، اور غیر ملکی دوستو، ساتھیو،
آج کے دن ہم فاتح کی حیثیت سے ورکر ز پارٹی کوریا کے عظیم جھنڈے کو سربلند کرتے ہوئے، بڑے فخر اور انبساط کے احساسات کے ساتھ اکتوبر کی چھٹیوں کا استقبال کر رہے ہیں۔
ہمارے ملک و قوم کے لیے 10 اکتوبر کا دن ایک معنی خیز انقلابی چھٹی دن کاہے۔ آج کے دن ہم انقلاب کے حقیقی سرخیل، فوجی جنرل سٹاف ، کی تاسیس کی سالگرہ مناتے ہیں۔ یہ وہ فوجی سٹاف ہے جس نے ہماری قوم کو منزلِ مراد تک پہچانے کی قائدانہ ذمہ داری اپنے کاندھوں پر اٹھا رکھی ہے۔
آج کے دن فوجی پریڈ اور عوامی جلوس اس ان تھک طاقت کا مظاہر ہ کریں گے جو ہماری جماعت کے رہنماؤں اور ممبران نے گزشتہ 70 برسوں سے برقرار رکھی ہوئی ہے۔ یہ مظاہرہ ساری دنیا کے سامنے ہمارے اہل کاروں اور لوگوں کے انقلابی جذبے کا منہ بولتا اظہار بنے گا۔ ہمارے لوگ ورکرز پارٹی کوریا کے ہمراہ، ہمت اور یقین سے سرشار، اتحاد اور یگانگت کے ساتھ اپنے روشن مستقبل کی طرف گامزن ہیں۔
آج کے اس پُرمسرت موقع پر ، جب کہ ہم ورکرز پارٹی کوریا کی عظیم تاریخ، جو فتوحات اور کامیابیو ں کی داستانوں سے معمور ہے، پر نظر ڈالتے ہیں، تو فخر محسوس کرتے ہیں، میں اپنی پارٹی کے لاکھوں وفادار ممبران کو، تمام اہل کاروں کو اور عام لوگوں کو دل کی گہرائیوں سے خراجِ تحسین پیش کرنا چاہتا ہوں۔ میں دل کی اتھاہ گہرائیوں سے کامریڈ کم ال سنگ ، جنھوں نے اس عظیم جماعت کی بنیاد رکھی اور کم یونگ ال ، جو ہماری عظیم ورکرز پارٹی کوریا کے تاحیات جنرل سیکریٹری ہیں، کا سپاس گزار ہوں۔
جاپان مخالف انقلاب کے علم برداروں ، عوامی افواج کے شھداء اور دیگر محب وطن شھداء ،جنھوں نے اپنے تمام گراں مایہ اثاثہ جات اپنے رہنماؤں کے ساتھ وفاداری کا عہد نبھاتے ہوئے، اس جماعت اور ملک کی تعمیر و ترقی پر لٹا دیے، انہیں ہم دلی طور پر جذبہ احترام کا نذرانہ پیش کرتے ہیں۔
ہمارے لوگ اپنی جماعت کے ساتھ کامل وفاداری اور سرخ پائیکٹو (Paektu ) انقلاب کے جذبے سے معمور حوصلوں کے ساتھ تمام مشکلات اور چیلنجوں کو عبور کر کے اس موقعے پر حاضر ہوئے ہیں تاکہ وہ انقلاب کی تاسیس کے اس مقدس موقعے کی عظمت کو دوبالا کر سکیں ، اس موقعے پر انھوں نے اپنی جماعت کو خراجِ تحسین پیش کرنے کے لیے اپنی بے مثال محنت کے کارناموں کے تحائف تیار کیے ہیں۔
آج میں اس مقام پر کھڑا ہوں جو فاتحین کا مرکز اور فتح کے جشن کا مقام ہے، یہ مقام ہمارے لوگوں کی پرجوش وفاداری سے کی یادوں سے معمور ہے، یہ مقام آپ کے لیے مخصوص کیا گیا ہے۔ میں اس مقام کو چننے کے لیے آپ کا شکر گزا ر ہوں۔ میں اس لمحے اپنے دل میں اپنے عوام کے لیے جذبہ احترام موجزن پاتا ہوں۔
ہماری جماعت گزشتہ 70 برسوں سے انقلاب کی ساتھ نئی منزلوں اور کامیابیوں کی طرف گامزن ہے۔ کوئی طوفان ،کوئی مشکل ہمارے ارادوں میں شکستگی پیدا نہیں کر سکی۔ اس کی وجہ اس کے علاوہ اور کچھ نہیں کہ اس عظیم قوم نے اپنی قسمت مکمل طور پر اس جماعت کے سپرد کر دی ہے اور اس کے مقاصد کو کامل وفاداری سے نبھا رہے ہیں۔
ہماری جماعت کی ساری تاریخ در حقیقت ہمارے عظیم لوگوں کا بنایا اور چلایا ہو ا راستہ ہی تو ہے۔ آپ کی طاقت سے اس جماعت کی طاقت ہے ، اس جماعت کی کامیابیاں آپ کی اپنی کامیابیاں ہیں۔
جماعت کی تاسیس کی 70 ویں سالگرہ کے موقع پر میں، ورکرز پارٹی کوریا کی طرف سے، کوریا کے محبوب عوام کا تہہ دل سے شکریہ ادا کرتا ہوں، جنہوں نے اپنی ان تھک قوت اور ہمت کو اس جماعت کی طاقت بنا یا ا ور انقلاب کی کٹھنائیوں کے دوران اس کے ساتھ اٹوٹ وفاداری کا مظاہرہ کیا، انھوں نے ہر دکھ سکھ میں اس کا ساتھ دیا، اور اپنی ناقابلِ شکست قوتِ ارادی کے ساتھ تاریخ کی ہر مشکل کا مقابلہ کیا۔
میں پوری گرم جوشی کے ساتھ ہماری جماعت کے معتمد ممبران، بہادر افسران اور عوامی افواج کے جوانوں اور قابلِ ستائش قائدین کا شکریہ ادا کرتا ہوں، جنھوں نے جماعت کی دعوت پر بڑی گرم جوشی سے لبیک کہا، حب الوطنی کے ساتھ اپنی خدمات انجام دیں، اور ایک اشتراکی قوم کی تعمیر کے لیے ہر محاذ پر اپنی کڑی محنت کے معجزے دکھاتے ہوئے سالوں کے کام مہینوں میں کر ڈالے۔ اس طرح وہ فاتح کی حیثیت سے اس عظیم تہوار میں شریک ہوئے۔
اس موقعے پر میں بڑی گرم جوشی سے سمندر پار اپنے ہم وطنوں اور غیر ملکی دوستوں کو بھی خوش آمدید کہتا ہوں، جو اس عظیم موقعے پر ہمارے لوگوں کو مبارک باد دینے کے لیے تشریف لائے ہیں۔
ساتھیو!
ورکرز پارٹی کوریا کی تاریخ ایک قابلِ فخر شاہراہ ہے جس پر ہمارے عظیم قائدین نے کاندھے سے کاندھا ملا کر قوم کے مستقبل اور کوریا کے انقلاب کو منزلِ مقصود پر پہنچایا ہے۔
صدر کم ال سنگ اور جنرل یونگ ال کی عظیم قیادت نے ہمارے لوگوں کو ایک ناقابلِ تسخیر جماعت اور ایک خالص سیاسی قائدانہ تنظیم میں تبدیل کر دیا ، جس نے عوام کی بہبود اور ان کے اتحاد و اتفاق کے لیے وہ خدمات انجام دیں ہیں جو تاریخ میں بے مثال ہیں ۔
ہماری جماعت کے سرخ جھنڈے کا نشان ہتھوڑا، درانتی اور لکھنے والا برش ہے، اس لیے ہماری جماعت کبھی بھی عوام سے دور نہیں ہوئی، اور اس انقلاب کو لے کر آگے ہی بڑھتی رہی ہے، اس کو عوام پر ہمیشہ ایسا ہی بھروسہ رہا جیسا کہ اسے خدا پر بھروسہ ہے۔
تاریخ میں ہمارے انقلاب جیسا کوئی انقلاب نہیں جس نے ایسی مشکلات اور پیچیدہ صورتِ حال میں ہر قدم پر ہر مشکل اور آزمائش کا پامردی سے مقابلہ کیا۔
نیا کوریا ابھی نوزائیدہ ہی تھا جب متحدہ ریاست ہائے امریکہ ، جو دنیا کی چودھراہٹ حاصل کرنے پر تلا ہوا ہے، نے ہم پر جنگ مسلط کردی تھی، ابھی ہم اپنا پیٹ کاٹ کر، ملبے کے ڈھیر سے اپنی قوم کی تعمیرِ نو میں مصروف تھے کہ انہوں نے ایک اور جارحانہ خطرہ ہمارے سروں پر لا کھڑا کیا ، جس وقت ہم اپنی قومی معیشت کو ترقی دینے کی کوشش کر رہے تھے، انھوں نے ہم پر ایسی ظالمانہ پابندیاں لگا کر ہمارے راستے بند کر دیئے جن کی مثال تاریخ میں نہیں ملتی۔
ان تمام مشکلات کے باوجود، ہماری جماعت آہنی اعصاب کے ساتھ ہر مشکل کو پاؤں تلے روند کر آگے بڑھتی ہی چلی گئی، اور کوریا کی اس سرزمین پر دور رس تبدیلیاں لا کر رہی، اور عظیم کامیابیاں حاصل کیں۔
تاریخ کے بھنور میں ہماری جماعت نے ہمیشہ اپنے عظیم لوگوں پر بھروسہ کیا ہے اور یہی لوگ اس کے مددگار، مشیر اور رفیق ہیں۔
دنیا کی انقلابی تحریکات کی تاریخ ہمیں یہ سبق سکھاتی ہے کہ جماعت چاہے اقتدار میں ہو یا نہ ہو، اس کی قیادت اور جدوجہد محض اپنے بل بوتے پر نہیں کی جا سکتی اور نہ ہی انقلاب کی قیادت موثر طریقے سے کی جا سکتی ہے۔
آج ہماری جماعت کو جو قائدانہ مقام حاصل ہے، جو عظیم کارنامے اس نے انجام دیئے ہیں، یہ سب ہمارے صدر اور جنرل صاحب کی بے مثال قیادت اور ان کے شاندار انقلابی نظریات کے مرہونِ منت ہے۔ انھوں نے اس عظیم انقلاب کی بنیاد لوگوں کے ساتھ محبت، شفقت اور ان پر اعتماد کی مستحکم بنیادوں پر رکھی ہے، اور پھر انہیں بنیادوں پر قوم و ملت کی تعمیر کی ہے۔
تاریخ کی مشکلات کو خاطر میں لائے بغیر، انقلاب کے سفر کی قیادت کرتی ہوئی ہماری یہ جماعت آزادی، سن گن (Songun )اور اشتراکیت کا علَم بلند رکھے ہوئے ہے۔ ہمارے اس عزم و حوصلے اور استقلال کا راز یہ ہے کہ ہم نے عوام میں اپنی گہری جڑیں بنائی ہیں اور پوری تندہی سے عوام کی خدمت ہمارا شعار ہے۔
ورکرز پارٹی کوریا ایک ناقابلِ تسخیر جماعت ہے جس نے عوام کی مدد سے اتحاد کی اکائی میں انھیں پرو رکھا ہے۔
انقلاب کی قیادت کی اس ساری مدت میں ہماری جماعت نے جب بھی کسی اقدام کا فیصلہ کیا اور جب اسے آزمائشوں کا سامنا کرنا پڑا، اس نے سب سے پہلے عوام ہی کو مخاطب کیا، ان کی آرا کو غور سے سنا، اور ان کے اخلاص سے اپنے لیے طاقت کشید کی۔
ایک مضبوط اشتراکی فصیل قائم کرنے میں، ایک خود مختار ، خود انحصار، اور خود اعتماد ملکی دفاع کی تشکیل اور قیام میں ہمارے قابل عوام کی تخلیقی طاقت ہی وہ منبع تھا جس نے ہمیں یہ معجزانہ کارنامے سرانجام دینے کا حوصلہ بخشا۔ اور یہ سب کچھ ہم نے اس سرزمین پر کیا جہاں صدیوں پرانی جہالت اور مفلسی چھائی ہوئی تھی۔ ہم اپنے ملک کو ایک نئے دور میں ایک طاقت ور ملک کے طور پر متعارف کروانے میں کامیاب ہوئے ہیں، باوجود اس کے کہ سامراجی طاقتوں نے اپنے ہتھکنڈوں سے ہمارے راستے میں بے شمار رکاوٹیں کھڑی کر رکھی تھیں۔
عوام کی سیاسی وحدت، ان کی مادی اور ثقافتی زندگی کی حفاظت اور ترقی ہماری جماعت کی اولین ترجیح رہی ہے ، یہ وہ مقصد ہے جس سے ایک لمحے کی غفلت ہمیں گوارا نہیں۔
ملک کی قسمت کے فیصلہ کن لمحات کے انتہائی مشکل اوقات میں بھی ہماری جماعت نے لوگوں کی خوشی اور خوشحالی کی خاطر اشتراکی اثاثہ جات تیار کیے، اور نہایت عرق ریزی سے عوامی بہبود کی پالیسیاں بنائیں جو ہماری عوامی محبت کی سیاست کی آئینہ دار ہیں۔ اور یہ سب ہماری جماعت ہی کر سکتی ہے جس نے عوام کی قسمت سنوارنے کی ذمہ داری اپنے کاندھوں پر اٹھا رکھی ہے۔
ہماری جماعت عوام کو اپنی ان تھک طاقت کا سرچشمہ قرار دیتی ہے، عوام کی بہبود کو اپنی اولین ترجیح سمجھتی ہے۔ ہمارے لوگ اس جماعت پر یقین رکھتے ہیں کہ یہ ان کے مستقبل کا مینارہءنور ہے، ان کے لیے گویا ماں کی آغوش ہے، اتفاق و اتحاد کا استعارہ ہے ، جس نے اس دینا میں اپنا قابلِ فخر وجود برقرار رکھا ہوا ہے۔
ساتھیو!
ورکرز پارٹی کوریا ، جس کا مقصد عوام کی خدمت ہے، اس کی طاقت ایک طاقت ور انقلابی مسلح فوج کی پشت پناہی ہے۔
ہمارے عوام نے اس حقیقت کو بڑی بالغ نظری سے سمجھ لیا ہے کہ اسلحے کے بغیر قوم کا مقدر تباہی کے سوا کچھ نہیں۔ انقلابی فوج درحقیقت ان کی عظمت اور خوشحالی کی ضمانت ہے۔
ہماری جماعت نے ایک ناقابلِ شکست فوج کی تعمیر و تشکیل میں ہر ممکن کوشش کی ہے تاکہ لوگوں کی جان مال، اور عزت و آبرو کی حفاظت کی جا سکے ۔
ہماری جماعت اپنے زورِ بازو سے اپنے ملک کا دفاع کرنے پر یقین رکھتی ہے۔ اور یہی سن گن (Songun)کا طرزِ سیاست ہے، جس نے ہماری عوامی فوج کو ایک اعلی تربیت یافتہ انقلابی فوج بنا دیا ہے ،جو کسی بھی جارح قوت کے دانت کھٹے کرنے کی صلاحیت رکھتی ہے۔ ہمہ قومی اور ہمہ ملکی دفاع نے ہمارے ملک کو ایک ناقابلِ تسخیر قلعہ اور ہماری فوج کو ناقابلِ شکست فوج بنا دیا ہے۔
ہماری انقلابی مسلح افواج ہمارے ملک ، اس انقلاب اور عوام کے دفاع کے لیے قیمتی سرمایے کی حیثیت رکھتی ہے۔ ہماری افواج ہماری عظیم طاقت اور ہمارا حفاظتی حصار ہیں اور یہ ملک و قوم کی ترقی اور خوشحالی میں قائدانہ کردار ادا کر رہی ہیں۔
ملک کی اشتراکی بنیادوں پر دفاع اور اس کے ساتھ قوم کی معاشی نمو کی جدوجہد نے ہماری جماعت کو تجربہ بخشا جس کی بدولت ہم عام آدمی کا معیارِ زندگی بہتر بنانے میں کامیاب ہوئے، اس کے باوجود کہ ملکی وسائل قلت کا شکار تھے۔
ہمارے اہل کاروں اور ہماری عظیم قوم نے امریکہ، جس نے جارحیت اور جنگ کو اپنے سامراجی عزائم کے حصول کا ذریعہ بنا رکھا ہے، سے ٹکر لی، اور اسے ایک کے بعد ایک شرمناک شکست دی، اس کی عائد کردہ سخت ترین پابندیوں کے حصار توڑ کر رکھ دیا۔ ہمارے لوگوں کے ناقابلِ شکست جذبے اور اتحاد کی ضربوں نے دشمن کے دل میں ہمارا رعب بٹھا دیا ہے۔
آج ہماری جماعت بڑے فخر سے یہ کہہ سکتی ہے کہ امریکہ چاہے کوئی بھی طریقہء جنگ اختیار کرے ہماری انقلابی افواج ہر طرح کی جنگی قابلیتوں سے لیس ہیں اور ہر جارحیت کا مقابلہ کرنے کی صلاحیت رکھتی ہیں۔ اپنی سرزمین اور لوگوں کی حفاظت کے لیے ہماری افواج ہر طرح سے تیار ہیں۔
ساتھیو!
ورکرز پارٹی کوریا کے فخر کا منفرد سرمایہ ہمارے نوجوانوں کی کثیر تعداد ہے، جن کو اس انقلاب اور عوام کے مستقبل کی ذمہ داریاں اٹھانے کے قابل بنانے کے لیے ان کی تربیت کی جاری ہے۔
اپنی جماعت کی ابتدا ہی سے ، انقلاب کی مستقل حفاظت کے پیشِ نظر ہماری جماعت نے نوجوانوں کی طاقت کو اپنی حکمتِ عملی کا لازمی جزو قرار دے رکھا ہے، اور اس خود انحصار جوچے Juche) ( انقلاب اور اس کے نفاذ کے لیے ہم نے ان کی مجاہدانہ تربیت کی ہے۔
ہماری پوری جماعت نے نوجوانوں کی تعلیم پر مستقل توجہ دی ہے، نوجوانوں کو اہم منصوبہ جات کی ذمہ داریاں سونپی ہیں۔ ہماری جماعت کے دیئے گئے بھروسے اور شفقت کے سائے میں ہمارے نوجوانوں نے اس انقلاب کے لیے ہر اول دستے کا فرض انجام دیا ہے، ہمارے نوجوانوں نے انقلاب کے ہر مرحلے میں ملکی دفاع کے لیے رضاکارانہ طور پر شاندار خدمات انجام دی ہیں۔ انہوں نے اپنی جواں سال ذہانت اور ہمت کا بھرپور استعمال کرتے ہوئے ہر مشکل اور چیلنج کا سامنا کیا ہے ۔
ہمارا انقلاب کا سفر بنا رکے، بغیر کسی تھکن کے پوری توانائی کے ساتھ اب بھی جاری ہے، اور یہ اس لیے ممکن ہے کہ ہمارے پاس ہمارے آہنی اعصاب اور ارادوں کے حامل نوجوانوں کی طاقت ہے، جو پارٹی کی قیادت میں آگے ہی آگے بڑھتے چلے جا رہے ہیں۔
پورے ملک کے مختلف حصوں میں نوجوانوں کی قوتِ عمل اور قربانیوں کی یادگاریں موجود ہیں، اور ابھی حال ہی میں ہمارے نوجوانوں نے اپنے حب الوطنی کے جذبے اور اپنی محنت سے ایک اور یادگار تیار کی ہے ، اور پارٹی کی تاسیس کی 70ویں سالگرہ کے موقعے پر پارٹی کو پیش کی ہے۔ یہ یادگاریں اس بات کا ثبوت ہیں کہ ورکرز پارٹی کوریا کی نئی کھیپ کتنی مستعد ہے اور کوریا کے انقلاب کی وراثت کتنے قابل ہاتھوں میں جانے والی ہے۔
ہماری جماعت نے نوجوانوں کے لیے کوئی کسر اٹھا نہیں رکھی۔ ہمارے ملک نے نوجوانوں کی تحریک میں ایک نئے خوشگوار دن کا استقبال کیا ہے، جس میں نوجوان ایک متحد اور عظیم طاقت بن کر سامنے آئے ہیں، اور اسی میں ان کے مسائل کو بھی احسن طریقے سے سلجھایا گیا ہے۔
ہماری جماعت نے جس طرح ہر مشکل اور آزمائش کا سامنا کرتے ہوئے کوریا کے انقلاب کو منزلِ مقصود تک پہنچانے کا تاریخی سفر جس کامیابی سے طے کیا ہے، اس سے ثابت ہوتا ہے کہ اگر آپ کے پاس لوگوں کی لاریب وفاداری ، طاقت ور انقلابی فوج اور نوجوانوں کی بڑی تعداد ہو، تو کوئی مشکل آپ کو خوفزدہ نہیں کر سکتی اور کوئی چیز ناممکن نہیں رہتی۔
کسی بھی انقلابی جماعت کی زندگی ، قوت اور روشن مستقبل کا راز اس کے عوام، افواج اور اس کے نوجوانوں کو اہمیت دینے میں ہےـ درحقیقت یہی خلاصہ ہے ہماری جماعت کی 70 سالہ تاریخ کا۔
اپنے عوام، آرمی اور نوجوان کو اہمیت دینے کی ہماری یہ تین نکاتی حکمت عملی ہی ہے، جس کے بل بوتے پر ہماری جماعت پوری تندہی سے اپنی حتمی منزل پر پہنچے گی اور کوریا کے انقلاب کی تکمیل کرے گی۔
ساتھیو!
ورکرز پارٹی کوریا، عوام کی تمام کامیابیوں اور فتوحات کے لیے ان کی تنظیم بھی کرتی ہے اور رہنمائی بھی۔
ہماری جماعت کی لافانی عظمت اور ناقابلِ تسخیر وجود کی بقا ہمارے صدر اور جنرل جیسے عظیم رہنماؤں کو اپنا تاحیات قائد تسلیم کرنے اور ان کے ساتھ اپنی کامل حمایت اور اعتماد وابستہ کر لینے میں ہے ۔
اگر ہماری جماعت نے کوریا کو ایک روشن مستقبل کی طرف لے جانا ہے تو اسے ہر قیمت پر اپنی انقلابی فطرت برقرار رکھنی ہوگی ۔ انہیں ہمیشہ یاد رکھنا ہوگا کہ یہ جماعت اپنے نام کم ال سنگ ا زم-کم جانگ ازم(Kimilsungism-Kimjongilism) اور اپنے کام دونوں کے لحاظ سے ایک انقلابی جماعت ہے۔ اور یہی اس کا طرّہ امتیاز ہے۔
کم ال سنگ ا زم-کم جانگ ازم کا عظیم اصول Kimilsungism-Kimjongilism ‘سب سے پہلے عوام’ کے اصول پر مبنی ہے۔ ہماری جماعت کا مقصد اور مزاج عوام کی خدمت ہے۔
ہم عظیم صدر اور جنرل صاحب کے ارفع نظریات پر صدقِ دل سے عمل پیرا ہیں۔ ان عظیم رہنماؤ ں نے تاریخ میں پہلی مرتبہ سیاست کے میدان میں عوام کو اپنی اولین ترجیح بنایا ان کی عزت اور محبت کا آدرش دیا، اور ان کی بہبود کے لیے اپنا سب کچھ قربان کر دیا۔ اپنے عظیم رہنماؤں کے نقش قدم پر چلتے ہوئے ہماری جماعت ‘سب سے پہلے عوام’ کے سنہری اصول کو مستقبل میں بھی اپنا منشور بنائے رکھے گی اور اس کی عظمت میں مزید اضافہ کرے گی۔
ہماری پوری جماعت اپنی تمام تعمیری سرگرمیوں میں اپنے عظیم صدر اور جنرل صاحب کی ہدایات کو اپنا مطمح نظر بنائے رکھے گی، ‘ سب سے پہلے عوام’ کے اصول کو اپنی ہر سرگرمی کا محور بنائے رکھے گی، اور عوام کی بہبود کی بے لوث خدمت کرتی رہے گی اور یوں ہر ممکن طریقے سے اپنی جدوجہد جاری رکھے گی۔
ورکرز پارٹی کوریا کا حقیقی چہرہ اگر دیکھنا ہے جو ملک کے حالات میں دیکھیے جو ہماری جماعت کی قیادت میں خوشحالی سے ہمکنار ہوئے، ہماری جماعت کا اصل روپ دیکھنا ہے تو لوگوں کے ہنستے مسکراتے چہروں میں دیکھیے۔
ہمارے لیے ہمارا سب سے قیمتی اثاثہ ہمارے عوام ہیں، کیوں کہ عوام ہی ملک کی بنیادیں ہیں۔ ان کے مفادات کا تحفظ ہمارے لیے ہر چیز سے زیادہ مقدس حیثیت رکھتا ہے۔
اس جماعت کے لیے ہم اپنے عوام کی بے لوث وفاداری کو قدر کی نگاہ سے دیکھتے ہیں اور اسے اپنا سب سے قیمتی سرمایہ سمجھتے ہیں۔ ہم اپنے دلیر، باصلاحیت اور خوبصورت لوگوں کے شاندار اور روشن مستقبل کو یقینی بنانے کے لیے کانٹوں بھرے راستے کی تمام مشکلات و مصائب کو اپنی ہمت و صلاحیت سے دور کر رہے ہیں۔
ہماری جماعت مستقبل میں بھی اسی شفقت و محبت، اسی جوش و جذبے اور اسی ان تھک محنت و لگن کے ساتھ انقلاب کے اس بھاری اور مقدس مشن کی ذمہ داری نبھانے کے عزم کا اعادہ کرتی ہے۔ ہماری جماعت اس عہد کو ایک بار پھر استوار کرتی ہے کہ ہم کسی بھی مشکل، کسی بحران کو خاطر میں نہ لاتے ہوئے اپنے عوام کی خدمت کی بنیاد ی ذمہ داری پوری وفاداری اور جذبہ حب الوطنی سے نبھاتے رہیں گے۔
کوریا کا انقلاب کسی پراسرار خدائی محرک کا نتیجہ نہیں، یہ ہمارے بہادر عوام اور کم ال سنگ اور کم یونگ ال کے مزدوروں کی شجاعت اور ہمت کی وجہ وجود پذیر ہوا ہے ان مزدوروں نے یک جان اور یک دل ہو کر اپنی جماعت کی ہدایات پر عمل کیا اور اس کی حفاظت کی۔
ہماری جماعت لوگوں پر ایسے ہی بھروسہ کرتی ہے جیسے خدا پر یقین رکھتی ہے،انہیں اپنا معلّم سمجھتی ہے، اور عوام بھی اپنی جماعت کو ایسے مانتے ہیں جیسے اپنی ماؤں کو، یہ یک سو اتحاد ہی کوریا کا اصل روپ اور سن گن
(Songun)انقلاب کی روح ہے۔
ہمارے افسران کو چاہیے کہ اپنے دل و دماغ کو جماعت کے اس منشور کے ساتھ ہم آہنگ کر لیں کہ ہم نے ہرحال میں عوام کا احترام کرنا ہے، ان کے ساتھ شفقت سے پیش آنا ہے، بےحد نرم خو رہنا ہے اور ان کی تمناؤں کی تعبیر کے راستے کی ہر مشکل کو آسان بنانا ہے۔ اسی طرزِ عمل سے عوام کی طرف سے ورکرز پارٹی کے لیے نیک جذبات، اٹوٹ اتحاد اور اشتراکیت کے لیے ان کی حمایت کو یقینی بنایا جا سکتا ہے۔
ہماری جماعت اس پر بات پر یقین رکھتی ہے کہ اس کے ممبران، اہلکار، اور کارکنان، اپنی جائے کار، عسکری مناصب، اور اپنے گاؤں سے متعلق اپنی رائے اور خیالات سے ہمیں اسی طرح آگاہ کریں جیسے اس جماعت کی مرکزی عاملہ کے ممبران دفتر کے باغیچے میں بیٹھ کر بات چیت کرتے ہیں، اور پھر ان خیالات کے نفاذ کے لیے وہ بے ریا وفاداری اور بے لوث حب الوطنی کے ساتھ ہمارا ساتھ دیں۔
ساتھیو!
ہماری جماعت کوریا کے عوام کو دوبارہ اکٹھا کرنے کی عظیم ترین خواہش کی تکمیل کے لیے اپنا فعاّل کردار پورے استقلال سے ادا کرے گی۔ ہم اس وقت کو منصہء شہود پر جلد لانے کے لیے پورے عزم و ارادے ، یک جہتی اور سن گن(Songun) کے ساتھ بیرونی طاقتوں کی ہر قسم کی رکاوٹوں اور سازشوں کا ڈٹ کر مقابلہ کریں گے اور انہیں ناکام بنا کر رکھ دیں گے ۔
ساتھیو!
جس طرح مزدوروں کا وجود ہمیشہ رہے گا ، اسی طرح لوگوں کے لیے لوگوں ہی کی مدد سے انصاف کے قیام اور فتح کے حصول کو یقینی بنانے کی جدوجہد بھی ہمیشہ جاری رہے گی۔
ہمارے عظیم صدر اور جنرل صاحب کے عظیم خیالات اور کامیابیوں کی مثال ہمارے سامنے ہے، انہوں نے لوگوں کی تربیت کرنے کے لیے اپنی زندگی وقف کردی تھی۔ وہ اپنے لوگوں پر ایسے ہی بھروسہ رکھتے تھے جیسے خدا پر یقین رکھتے تھے ۔ انہوں نے کوریا کی عظمت میں اضافہ کیا۔ ہماری جماعت ان کے نقش قدم پر چلتے ہوئے لوگوں سے محبت کا تعلق برقرار رکھے گی، اور ان کے خوبصورت خوابوں کو شرمندہء تعبیر کرنے کے لیے اپنی جدوجہد جاری رکھے گی۔
تاریخ کا کوئی چیلنج، دشمن کی کوئی جنونی کوشش ہمارے اہلکاروں اور عوام کی پیشرفت کو روک نہیں سکتی۔ ہمارے لوگ اس جماعت کے جھنڈے کے نیچے متحد ہیں، ہمارے دشمن ہمارے عوام کی مجاہدانہ جدوجہد کو ہرگز کمزور نہیں کر سکتے ۔ ہمارے لوگ اپنے روشن مستقبل کی سمت بڑھتے چلے جا رہے ہیں ، جماعت کے انقلابی خیالات کا تقدس اور پیکتو(Paektu ) کے طوفان کی قوت ہمارے عوام کی اس پیشرفت کا محرک ہے اور اس عظیم جماعت کا سرخ جھنڈا ان کی کشتی کا بادبان ہے۔
دنیا دیکھے گی کہ ورکرز پارٹی کوریا کس طرح اپنے لوگوں کو بھرپور طاقت اور عقل و حکمت کی دولت سے نوازتی ہے، اور کس طرح ان کو ایک عظیم پیکتو (Paektu ) قوم بناتی ہے، جو اس کرہ زمین پر دینا کی سب سے طاقت ور اور خوشحال قوم ہوگی۔
عظیم ورکرز پارٹی کوریا اپنے لوگوں پر ایسے ہی بھروسہ کرتی ہے جیسے خدا پر یقین رکھتی ہے، یہ وہ لوگ ہیں جو ہمارے مقدس انقلاب کے نام پر یک جان اور ہم آہنگ ہوئے ہیں۔ اس انقلاب کی کامیابی کی 70 سالہ تاریخ وہ انجن ہے جو اس انقلاب کی ذمہ داری اٹھائے ہوئے نئی منزلوں کی طرف گامزن ہے۔ خود انحصار (juche)انقلاب اپنی فتح اور عظمت کے لیے لوگوں کی نظروں میں ہمیشہ قابلِ تعریف اور قابلِ تحسین رہے گا۔
آخر میں، اپنی جماعت کے تمام اراکین سے گزارش ہے کہ آئیے عہد کریں کہ اپنے عوام کے لیے بے غرض، اور جان نثار کوششوں کا سلسلہ جاری رکھیں گے ۔
ناقابلِ شکست ورکرز پارٹی کوریا کے گرد یک جان اور متحد کوریا کے عظیم لوگو، ہمیشہ سلامت رہو!